Si rrallëherë Bundesliga ditën e dielë rezervoi dy përballje të shkallëve të fundit të klasifikimit, sidoqoftë nga kalendari përfitoi në maksimum ekipi i Hamburgut që siguroi fitoren e dytë radhazi në shtëpi, duke lëvizur më në fund nga pjesa e ftohtë e tabelës. Në Volksparkstadion përpara 46.000 spektatorëve vendasit kaluan shpejt në avantazh, madje pa u sforcuar aspak vetë, sepse krosimin e Douglas Santos pas depërtimit të shpejtë të mbrojtësit brazilian nga e majta e devijoi në minutën 6 në portën e Hoffenheimit vetë qendërmbrojtësi i klubit nga Sinshaimi Kevin Akpoguma. Miqtë që kishin fituar vetëm 1 nga 6 ndeshjet e fundit në kampionat shtuan përpjekjet për të barazuar, megjithatë ekipi i Hamburgut rezistoi shkëlqyeshëm, madje dyfishoi rezultatin çerek ore përpara fundit. Merita i takon padyshim lojtarit më të mirë të ndeshjes sulmuesit serb Filip Kostic që mori përsipër ekzekutimin e një goditje dënimi nga afërsisht 30 metra. Portieri Oliver Baumann duke menduar distancën e largët nënvlerësoi ndjeshëm situatën dhe nuk rreshtoi fare barrikadë përpara vetes e kështu “veriorët” shënuan edhe golin e sigurisë. Në fund kishte lavdi gjithashtu edhe për Gideon Jung, që dy minuta para fundit vulosi rezultatin 3-0, pas topit të vështirë të kthyer me kokë drejt qendrës nga Diekmeier. Për skuadrën e Markus Gisdol që në të kaluarën ka drejtuar për dy sezone ekipin e Hoffenheimit njëri ndër lojtarët më të mirë të takimit ishte edhe mbrojtësi i përfaqësueses kuqezi Mërgim Mavraj, që ishte si një digë në repartin e tërhequr të Hamburgut.
Nuk ka fund kriza e Kolnit që ende nuk ka regjistruar fitoren e parë në këtë sezon dhe pozicionohet e fundit me vetëm 2 pikë të grumbulluara. Në sfidën që mbylli javën e 13-të të Bundesligës, Kolni u mposht në shtëpi me rezultatin e pastër 0-2 nga Hertha Berlinit. Kryeqytetasit iu falën një dygolësh të sulmuesit boshnjak Vedad Ibisevic për tiu larguar sa më shumë fundit të renditjes.
