U luajtën vetëm katër sfida në NBA, ku më e rëndësishmja ishte ajo e zhvilluar në “Moda Center” të Portlandit, me të zotët e shtëpisë që nuk i zhgënjyen pritshmëritë, duke fituar 118-103 ndaj Milwaukee Bucks. I papërmbajtshëm për Blazers CJ McCollum, autor i një paraqitjeje të jashtëzakonshme me 40 pikë, 6 asiste dhe 5 topa të kontrolluar poshtë koshit. Mbetet shumë pas në statistika “ylli” i Bucks, Giannis Antetokounmpo, që realizoi vetëm 23 pikë, dha 6 asiste dhe kontrolloi 9 topa.
Skuadra nga Oregoni me këtë sukses shkon në kuotën e 8 fitoreve në Konferencën e Perëndimit, ndërsa Bucks pësuan humbjen e dytë në 10 takime të zhvilluara gjithsej, duke u renditur të dytët në Lindje pas Toronto Raptors.
Vijon paraqitja e mirë e Brooklyn Nets, që këtë radhë triumfuan 82-104 në parketin e Phoenix Suns. Spikati në këtë përballje LeVert me 26 pikë, ndërsa Russell shtoi edhe 15 pikë të tjera për Nets.
Luca Doncic mbetet inspiruesi i Dallas Mavericks, që përtej vështirësive të fillimsezonit, u kthyen më në fund te fitorja pas një serie të gjatë humbjesh. Talenti slloven shënoi 23 pikë në suksesin 119-100 ndaj Washington Wizards, për të cilët nuk mjaftoi paraqitja e mirë e John Wall, që e mbylli takimin me 26 pikë, 10 asiste dhe 4 topa poshtë koshit.
Siguruan fitoren e 6-të sezonale Charlotte Hornets, 113-102 ndaj Atlanta Hawks, duke shfrytëzuar formën e mirë të Kemba Walker, që pati statistikat më të mira: 29 pikë, 7 asiste dhe 3 rebound.
