Spezia fitoi Play Off-in ndaj Frosinones mbrëmjen e djeshme dhe kompletoi numrin prej 20 skuadrash që do të garojnë në Serinë A italiane sezonin e ardhshëm.
Kampionati është vendosur të startojë më 19 dhe 20 shtator, ndërsa ditën e parë të muajit të ardhshëm do të hidhet edhe shorti për kalendarin e sezonit të ri, ndonëse këtë herë pa ndonjë ceremoni për shkak të koronavirusit.
Aktualisht 7 prej skuadrave, konkretisht Benevento, Verona, Lazio, Crotone, Udinese, Cagliari e Torino kanë nisur përgatitjet për sezonin e ri, ndërsa Napoli do të grumbullohet më datën 23, Milan e Juve më 24 dhe Roma e Friedkin më 27 gusht.
Ende nuk është vendosur se kur do të nisë përgatitjet Interi, që me siguri do t’u japë të paktën 10 ditë pushime futbollistëve pas finales së sotme në Europa League, ndërsa zikaltrit kanë kërkuar që të mos kthehen në fushë më 19 shtator, por një javë më vonë.
