Leart Paqarada do të luajë në Bundesliga sezonin e ardhshëm. Anësori i majtë është pjesë e St Pauli prej gushtit të vitit 2020, me skuadrën gjermane numëron një gol dhe katër asiste këtë sezon, teksa mban edhe shiritin e kapitenit.
Performancat pozitive kanë tërhequr vëmendjen e Koln, por jo vetëm. Paqarada del lojtar i lirë në fundin e këtij sezoni. 28-vjeçari pritet të transferohet tek ekipi i njohur gjerman me parametra zero në verë.
“Ai është mbrojtësi i majtë më i mirë në Bundesliga 2, do të më pëlqente shumë të luante me ne. Gjysma e ekipeve të Bundesligës po tentojnë ta joshin. Paqarada luan rregullisht prej vitesh, po flasim për një futbollist shumë inteligjent, i cili ka aftësi të mëdha teknike.
Ka siguri të madhe në ndërtimin e ndeshjes dhe arrin të gjejë zgjidhje edhe kur është nën presionin e kundërshtarëve”, u shpreh Christian Keller, drejtori sportiv i Koln në lidhje me lojtarin dardan, i cili vazhdon të mos marrë ftesa nga Kosova.
Kapiteni historik i Koln, Jonas Hector mendohet të tërhiqet në fundin e këtij sezoni dhe drejtuesit kanë zgjedhur shqiptarin si pasuesin e tij. Shtypi gjerman raporton se bëhet fjalë për një kontratë 3-vjeçare mes Paqaradës dhe Koln.
