Te Tirana preferojnë të flasin vetëm nëpërmjet zyrtarizimit por mediat Keniane e bëjnë fakt të kryer transferimin e Keneth Muguna dhe Musa Muhamed në radhët e bardhebluve. Mediat në Nairobi madje japin edhe detajet dhe prononcimin e vetë protagonistëve që me zor presin të zbarkojnë në kryeqytetin shqiptar. Mbrojtësi dhe mesfushori që vijnë nga radhët e Gor Mahia ekipit që drejtonte Ze Maria para se të merte timonin e Tiranës, kanë marrë tanimë dokumentat e udhëtimit, një detaj jo pak i rëndësishëm po të kujtosh se futbollistët afrikanë shpesh mbeten peng i procedurave burokratike në ndaleset e tyre në aeroporte, dhe do të nisen drejt Shqipërisë këtë të dielë me zyrtarizimin që pritet të behet në fillimin e javës së ardhshme. Mesfushori Muguna, i kërkuar me ngulm nga trajneri brazilian, vjen te 24 herë kampionët e Shqipërisë me parametra zero pasi kontrata e tij me kampionët e Kenia-s ka përfudnuar , ndërkohë që për kartonin e mbrojtësit Muhamed mediat keniane pretendojnë se akordi është arritur për rreth 30 mijë euro. Musa Muhamed që ka luajtur me Gor Mahian që nga viti 2010 shprehet për mediat e vendit të tij madje, se është vërtet i kënaqur që ky transferim është kryer, dhe me zor po pret të fillojë udhëtimin e tij të re, duke shpresuar që të japë më të mirën e tij në kampionatin shqiptar.