Trajneri i Tiranës, Ardian Mema, u shpreh shumë i kënaqur me fitoren në takimin me Kukësin, por njëkohësisht e pranon se loja e bardheblkuve, përtej fitores, pati probleme, sidomos në pjesën e dytë.
Sot morët një fitore të rëndë…
Trajneri mendon të këqijat para të mirave. Patëm probleme në pjesën e dytë. Dua të luajë mirë ekipi e para dhe e dyta të ketë ekuilibër e të fitojmë. Por, të ketë rrjedhë, jo me raste sporadike. Pjesën e dytë patëm probleme. Gjithsesi, është kthyer entuziazmi, dhe kemi nisur me fitore.
Edhe mbrojtja e Tiranës rezistoi…
Nuk jam tip që kënaqem kollaj, por gjërat kanë lëvizur për mirë. Kanë luftuar, bënë detyrat që i kemi caktuar. Imami më kënaqi, ishte vendimtar në mbrojtje. Fitorja të kthen entuziazmin. Ekipi ishte në ekuilibër, por analizat e mia nuk do të pushojnë. Kemi bërë edhe gabime sot.
I bëtë nder Partizanit me këtë fitore, a prisni mesazhe falënderimi nga populli i kuq?
Në ditët në vazhdim, do t’i bëjmë nder edhe Kukësit, edhe ne do luajmë me Partizanin, mund të fitojmë edhe me ta. Janë harmonizuar veprimet në çifte dhe reparte. Ekipi ka kërkuar gjithë kohës ta fitojë ndeshjen. Nga rezultatet e këqija, ka edhe uri për të fituar. Ne kemi vazhdimësinë tonë, dhe duhet të shohim përpara.