Laçi konfirmon afrimin e qendërmbrojtësit nga Kili, Sebastian Toro. Është vetë klubi kurbinas që ka bërë të ditur mbylljen e marëveshjes me një postim në faqen zyrtare në instagram. Trajnerit të ri, Artan Mërgjyshi, i ka mjaftuar vetëm një seancë stërvitore për të konfirmuar 28-vjeçarin si pjesë të skuadrës për sezonin e ri.
Pas mbylljes së aventurës europiane, bardhezinjtë ishin në kërkim të një qendërmbrojtësi, duke qenë se në dispozicion kishin vetëm Eglentin Gjonin në këtë rol. Marko Radas dhe Erjon Hoxhallari ishin lojtarët që luajtën në qendër të mbrojtjes gjatë sfidave të Europës, pas largimit të Harallamb Qaqit. Sebastian Patricio Toro Hormazabal ka një CV të pasur, duke qenë se është aktivizuar për skuadrën më të madhe në Kili, Colo Colo, ndërkohë që ka qenë pjesë e kombëtares së vendit të tij.
Konfirmimi i 28-vjeçarit nuk pritet të jetë i fundit, pasi drejtuesit e Laçit po kërkojnë një sulmues krahu dhe një qendërsulmues të mirëfilltë për të qenë pjesë në formacion. Ndërkohë që në treg po kërkohen edhe futbollistë të tjerë për të plotësuar organikën.
Menjëherë pas zyrtarizimit të Toros vjen dhe goditja e radhës me një futbollist të perspektivës. Jon Mersinaj talenti-19 vjeçar i Lokomotivës së Zagrebit i bashkohet për një vit huazim ekipit Laçit.
