Merkatoja e Tottenhamit deri më tani ka qenë e vaktë, Ndombele është blerja e vetme që kanë bërë drejtuesit e klubit. 60 milionë euro janë shpenzuar nga “Spurs” për të siguruar shërbimet e mesfushorit. Ndërkohë që në listën e dëshirave janë Gareth Bale dhe Paulo Dybala. Për asnjërin prej tyre londinezët nuk kanë bërë asnjë hap konkret. Një situatë që ka sjellë pakënaqësi tek numri 1 i stolit të Tottenhamit, Maurcio Pochettino.
I pyetur rreth merkatos, trajneri u përgjigj se detyra e tij është të stërvitë ekipin dhe nuk ka përgjegjësi për asgjë tjetër, teksa shtoi se për këtë pjesë duhet pyetur Daniel Levy, presidenti i “Spurs”. Një përgjigje që në mënyrë indirekte tregon një lloj irritimi nga ana e Pocehtinos. Trajneri ka folur edhe për Dany Rose, i cili qëndroi në Londër dhe nuk i është bashkuar ekipit gjatë turneut aziatik.
Lojtari dukej sikur ishte pranë largimit, por në fakt nuk është kështu, madje ai ka qenë me pjesën tjetër të ekipit gjatë Audi Cup. Për rastin në fjalë Pochettino u shpreh se Rose është një lojtar i Totenhamit dhe se nuk ka asnjë lloj mundësie që ai të largohet.
Mesazhi i argjentinasit për drejtuesit e klubit është i qartë, ekipi ka nevojë për blerje, në të kundërt duket e vështirë që skuadra të pretendojë diçka më tepër se pjesëmarrja në Champions.
