Lajme mjaft të mira për trajnerin Edi Reja, kur jemi rreth një javë larg grumbullimit për ndeshjet e fundit eliminatore të Botërorit Katar 2022. Mesfushori Qazim Laçi, i cili mungoi për sfidat ndaj Hungarisë e Polonisë për shkak dëmtimi, është rikuperuar totalisht.
Pasi luajti 17 minuta në sfidën e javës së kaluar ndaj Nancy një javë më parë, mesfushori që mban numrin 10 te Ajaccio, e nisi si titullar në transfertën ndaj Pau mbrëmjen e sotme dhe qëndroi në fushë për plot 79 minuta.
Dëmtimi është vetëm një kujtim tashmë për Laçin, që është rikuperuar plotësisht dhe pritet të jetë në dispozicion të trajnerit Edi Reja për ndeshjet ndaj Anglisë e Andorrës më 12 dhe 15 nëntor.
Titullarë edhe dy futbollistët kuqezi të Konyasporit, Sokol Cikalleshi dhe Endri Çekiçi, të cilët dhanë një kontribut të madh në fitoren ndaj gjigantëve turq të Fenerbahces. Rreth 80 minuta në fushë për fantazistin Çekiçi dhe ndeshje e plotë për Cikalleshin, që nuk ishte për ndeshjen me Poloninë për shkak të koronavirusit.