Arbnor Muçolli ka qenë protagonist në ndeshjen e skuadrës së tij Vejle. Në takimin e superligës daneze ndaj Viborg, mesfushori shqiptar realizoi golin e dytë për të tijtë në minutën e 49-të. Edhe pse Vejle mori kryesimin falë rrjetës së futbollistit kuqezi, për fat të keq nuk ia doli ta ruante deri në fund rezultatin duke e mbyllur sfidën në barazim 2-2.
Ndërkaq, në 20 ndeshje të luajtura në këtë sezon, Muçolli shënoi për herë të katërt emrin e tij në listën e golashënuesve ndërsa është shndërruar në një lojtar të rëndësishëm për danezët. Aktualisht, Vejle është në vendin e shtatë të kampionatit teksa udhëheq grupin e skuadrave që rrezikojnë të bien një kategori më poshtë.
Megjithatë, deri në këtë moment duken të sigurt pasi janë të shkëputur nga dy vendet e fundit. Muçolli ka qenë edhe pjesë e skuadrës Shpresa të Shqipërisë ndërsa në 10 paraqitje me skuadrën e Alban Bushit ka shënuar edhe një gol.