Mesfushori i Milanit, Giacomo Bonaventura nuk po gjen qetësi nga dëmtimet dhe kur pritej që të arrinte formën më të mirë, ka pësuar një tjetër tërheqje muskulore, duke mbetur jashtë listës së futbollistëve të grumbulluar nga Pioli për sfidën ndaj Lecces, bashkë me Mattia Caldarën, që është në fazë rikuperimi.
Italiani është dëmtuar në stërvitjen e fundit pasditen e djeshme, ndërsa sipas drejtuesve të klubit kuqezi, vetëm ditën e nesërme do t’u nënshtrohet ekzaminimeve të rastit, për të parë shkallën e lëndimit dhe për të përcaktuar kohën e rikuperimit.
Ndërkohë Pioli duket se mund të befasojë që në sfidën e parë të tij si trajner i Milanit, pasi në seancën e fundit stërvitore ka testuar një skuadër me Leaon në majë të sulmit, i mbështetur nga Rebiç dhe Suso, ndërsa në stol ka përfunduar Piatek.
