Leo Messi është gjithnjë e më pranë qëndrimit te Barcelona dhe do të rinovojë deri në vitin 2026. Lajmin e bën të ditur e përditshmja katalane “Sport”, historikisht shumë pranë klubit “blaugrana”, që lajmëron dhe arritjen e akordit mes “yllit” argjentinas dhe Barcelonës si diçka të kryer. Tani topi kalon në fushën e presidentit Laporta, që duhet të reduktojë zërin e fondit të pagave të skuadrës në mënyrë që kapiteni të mund të firmosë kontratën e tij të re.
Tratativat, që zgjasin prej muajsh, tanimë janë mbyllur dhe zyrtarizimi pritet në ditët e ardhshme. Messi është pa kontratë që nga 30 qershori, por gjithmonë ka demonstruar dëshirën për të zgjatur bashkëpunimin me klubin.
Presidenti i ri “blaugrana”, pavarësisht situatës së vështirë financiare dhe llogarive të komplikuara, ka qenë gjithmonë optimist për rinovimin, por tani i duhet të mbyllë gjithçka për t’i mundësuar Messit që të rikthehet të stërvitet me skuadrën. Objektivi është që të reduktojë fondin e pagave sa më shpejt që të mundet.
Rinovimi do të jetë për pesë sezone, më një ulje të pagës prej 50% për të mos rënduar situatën dramatike financiare që po kalon Barcelona. Pikërisht kjo situatë vonon formalizimin e kontratës së re, pasi klubi duhet të ulë zërin e pagave për ta sjellë atë në parametrat e kërkuar nga LaLiga, në mënyrë që të zyrtarizojë kontratën dhe federimin e Messit.
Lamtumira e lojtarëve si Umtiti, Pjanic e Braithwaite për të reduktuar zërin e pagave, tratativat me veteranët Pique dhe Griezman për të ulur pagat e deri te çështjet Griezmann dhe Coutinho, që u duhet gjetur një sistemim jashtë klubit, mund të përshpejtojnë gjithçka. Messi, për momentin, është ende me pushime në Ibiza dhe pret që të zyrtarizohet rinovimi. E sigurt është që nuk do të mund të rikthehet të stërvitet para se të ketë firmosur kontratën e re dhe është e mundur që të mos marrë pjesë as në Trofeun Gamper të së dielës së ardhshme, ku Barcelona do të përballet me Juventusin e Cristiano Ronaldos.