Serie A

Milan fillon spastrimet, zv/ kapitenët me valixhe në duar

Në pritje të verdiktit final të UEFA-s, drejtuesit e Milanit nuk kanë filluar ende të merren me merkaton në hyrje. Fassone dhe Mirabelli janë fokusuar në spastrimin e organikës, nga ata lojtarë që konsiderohen të panevojshëm nga Gattuso dhe që mund të sjellin para në arkat e kuqezinjve.

Kështu në krye të listës së të panevojshmëve kanë përfunduar dy zv/ kapitenët, Riccardo Montolivo dhe Ignazio Abate, por edhe i riu Manuel Locatelli. Për Montolivon ka një interes të theksuar nga Verder Bremen, drejtuesit e të cilës pritet të mbërrijnë në filim të javës në Milano, për të negociuar transferimin e tij.

Gjermanët synojnë që me Montolivon të zëvendësojnë mesfushorin Delaney, që do t’i bashkohet Borussias së Dortmundit, për sezonin e ardhshëm. Sa i përket Abates, interes për të kanë shprehur anglezët e Wolverhampton, skuadër e sapongjitur në Premier League dhe që kërkon të përforcohet për të mos u kthyer sërish andej nga erdhi.

Gjithsesi, pikëpyetja e vetme e kuqezinjve është rikthimi i Andrea Contit, pasi nëse ky i fundit nuk rikuperohet brenda shtatorit, Gattuso do të mbetet vetëm me Calabrian në të djathtë.

Sa i përket Locatellit, djaloshi pëlqehet shumë nga Stefano Pioli, që e kërkon me ngulm te Fiorentina. Drejtuesit e Milanit presin ndërkohë verdiktin final të UEFA-s, për të përfshirë më pas Locatellin në një marrëveshje që do të sillte në “San Siro”, mesfushorin Veretout.

To Top