Milani i Piolit, me sëmundjen e vjetër. Në ditëlindjen e tij të 54-t, kur priste një dhuratë të bukur nga kuqezinjtë me rastin e debutimit në krye të “Djallit”, trajneri italian mbeti më shumë se i zhgënjyer nga barazimi 2-2 me Leccen në “San Siro”.
Dy herë kaloi në epërsi Milani dhe po kaq herë u shfaq naiv, duke u kapur në befasi nga skuadra puljeze, e cila iu gëzua me të drejtë pikës sikur të kishte marrë fitoren.
Pioli e nisi ndeshjen me një ndryshim në vijën e parë, duke lënë në stol Piatek, në vend të të cilit u aktivizua Leao.
Kuqezinjtë e nisën vrullshëm takimin, duke dhuruar disa kombinime mbresëlënëse në fazën sulmuese, derisa Calhanglu shënoi një gol të bukur nga një kënd i prirët, duke entuziazmuar të pranishmit në “San Siro”.
Më kalimin e Minutave Lecce e rriti shumë lojën e saj, derisa në minutën e 62-të fitoi një 11-metërsh, që u shndërrua në gol nga Babacar. Donnarumma reagoi bukur në momentin e parë, por topi shkoi sërish te këmbët e futbollistit të Lecces, që barazoi shifrat.
Thuajse 20 minuta më vonë, Calhanglu me një gjest mahnitës futet në thellësi të zonës dhe pason në qendër për Piatek, i cili nuk fal, 2-1.
U duk sikur Milani e siguroi fitoren, por gaboi rëndë në minutat shtesë, kur i dha mundësinë Calderonit të realizonte një gol spektakolar nga jashtë zonës, me topin që pasi qethi shtyllën përfundoi në rrjetë.
Zhgënjim i madh te futbollistët dhe tifozët e Milanit, që shpërdoruan dy herë epërsinë përballë një ekipi modest, duke lënë dy pikë të tjera në këtë fillim kampionatin.
