Takimi i sotëm ishte vërtetë i veçantë për trajnerin serb të Kukësit, pasi u rikthye në qytetin e Gjirokastrës, aty ku u promovua vitin e kaluar.
“Jam shumë i lumtur për banderolën e tifozëve dhe duartrokitjet e tyre ndaj meje. Më vjen mirë, sepse kjo do të thotë që diçka të mirë e kam bërë edhe unë. Ky është një qytet i bukur, ku unë kam kaluar një vit mjaft të mirë nga ana sportive”, tha trajneri i Kukësit.
Milinkoviç vlerësoi edhe paraqitjen e ekipit të tij, ndërsa nuk preferoi të komentojë golin e polemizuar të Elis Bakajt.
“Kur ne luajmë ashtu siç dimë dhe realizomjë detyrat taktike, mund të argëtohemi dhe të mposhtim çdo kundërshtar. Kemi element mjaft cilësorë në skuadër, të cilët janë të aftë të bëjnë diferencën në fushë”, tha serbi.
Trajneri serb rihapi edhe një herë çështjen e largimit nga Luftëtari, teksa akuzoi se nuk ka marrë ende disa paga, por edhe bonuset e rezultateve. Ai u shpreh se ka dërguar kallëzimin në federatë dhe në FIFA, të cilat duhet të zgjidhin këtë situatë.
