Me Napolin që po përfundon përgatitjet, në prag të angazhimeve në turin “play off” të Champions, Elseid Hysaj mbetet jo vetëm titullar i padiskutueshëm, por një lojtar i paprekshëm.
Mbrojtësi shqiptar ishte i vetmi lojtar i aktivizuar përgjatë gjithë miqësores nga trajneri Sarri në testin përballë Bournemouth-it, skuadër e Premier League angleze, që u mbyll në barazim 2-2.
Në Vitality Stadium, avantazhi i Napolit me Mertens u përmbys në pjesën e dytë të lojës me golat e Afobe dhe Francis. Gjashtë minuta përpara fundit Zielinski evitoi humbjen për italianët, në një ndeshje ku “të kaltërit” meritonin padyshim më tepër.
Amir Abrashi qëndroi në stol dhe u aktivizua vetëm në minutën e 82-të të miqësores ku Fraiburgu u mposht 2-1 nga Torino. Gjermanët i mbyllën 45 minutat e para të lojës në avantazh me golin e Schuster, por italianët përmbysën rezultatin menjëherë pas pushimit ndërmjet pjesëve me Iago Falque dhe Andrea Belottin.
Si zëvendësues u aktivizua edhe Keidi Bare në miqësoren ku Atletico e Madridit fitoi 3-2 në Londër përballë Brighton & Hove Albion. Golat e Gaitan, Fernando Torres dhe Lucas bën që “colchoneros” të mbeten të pamposhtur në miqësoret e verës.
Edhe pse shënoi dhe ishte pjesë e rëndësishme në suksesin në finalen e Audi Cup ndaj Liverpool, Bare luajti vetëm pak sekonda në testin e radhës, duke u aktivizuar në fundin e ndeshjes në vend të Griezmann.
