Kombëtarja shqiptare e vajzave do të rikthehet në fushë për të luajtur dy ndeshje miqësore kundër Maqedonisë së Veriut dhe Kenias në muajin prill.
Trajneri i vajzave kuqezi, Armir Grima ka zbardhur këtë të shtunë listën me emrat e futbollisteve të grumbulluara për këto dy takime miqësore që Shqipëria do të luajë ndaj Maqedonisë së Veriut më 7 prill në “Elbasan Arena”, ndërsa katër ditë më vonë do të zhvillojë një tjetër takim miqësor ndaj Kenias në transfertë.
Lexo edhe:
- Dy lojtarë kërkuan largimin e Contes, mediat zbulojnë emrat e “puçistëve”
- Një “i çmendur” për stolin, Uruguai gjen trajnerin e ri
- Kupa e Shqipërisë, përcaktohen çiftet gjysmëfinaliste
- Më të paguarit në Francë, futbollistët e PSG-së “zaptojnë” 10-shen e parë
Tekniku shqiptar ka grumbulluar 23 lojtare për këto dy ndeshje, me 15 prej vajzave që aktivizohen në kampionatin shqiptar, 5 prej tyre në kampionatin kosovar dhe 3 në kampionatin europian. Trajneri Grima ka rikthyer sërish në ekipin e parë A, dy lojtare si Katerina Simoni, e cila luan me ekipin e Tiranës dhe Valentina Trokën, e cila aktivizohet në skuadrën e Apolonisë, ndërsa pas grumbullimit rutinë në Ulqin, ka thirrur sërish në skuadër edhe sulmuesen Diellza Istrefaj.
Skuadra do të nisë nga e mërkura e ardhshme grumbullimin në Tiranë, teksa sfida e parë ndaj Maqedonisë së Veriut do të luhet më 7 prill në stadiumin “Elbasan Arena”, e planifikuar të nisë në ora 16:00, ndërsa ndeshja e dytë është ajo ndaj Kenias, më 11 prill, ora 16:00, po në stadiumin “Elbasan Arena” në Elbasan.
Këto dy ndeshje miqësore janë shumë të rëndësishme dhe i vlejnë shumë teknikut Armir Grima dhe stafit të ekipit kombëtar A për të parë gjendjen reale të skuadrës, në kuadër të përgatitjeve për fushatën e Eliminatoreve të Kampionatit të ardhshëm Europian që nis në muajin shtator.
