Yamaha ndëshkohet nga Federata Ndërkombëtare e Motoçiklizmit. Skuderia japoneze rrezikonte edhe përjashtimin, por dënimi nuk është aq i ashpër, megjithatë masa konsiston në -50 pikë në renditjen e përgjithshme për konstruktorë. Reduktimi është i ndarë mes Yamahas zyrtare dhe Yamahas Petronas, -20 pikë për atë zyrtare dhe -30 për Petronasin.
Gjithçka lidhet me modifikimet që skuderia japoneze kreu në motor, të cilat janë kryer jo konform rregullave. Më konkretisht, Yamaha, në Jerez, në Spanjë, ka ndryshuar valvulat në motorin M1, që ishin difektoze pa marrë aprovimin e skuderive të tjera, që sipas protokollit duhet në raste të tilla të japin “ok” ose të mos e lejojnë ndërhyrjen.
Yamaha në këtë mënyrë zbret nga vendi i parë në vendin e 3-të, ndërkohë që Yamaha zyrtare shkon në vendin e 5-të. Gjithsesi, pavarësisht reduktimit të 50 pikëve në renditjen për konstruktorë, Yamaha mund të marrë frymë, sepse nuk është prekur klasifikimi i përgjithshëm për pilotë, aty ku Maverick Vinales, Fabio Quartararo dhe Franco Morbidelli janë në garë për titull dhe për momentin renditen pas kryesuesit, Joan Mir.