Kosova U21 ka arritur të mposhtë bindshëm Turqinë, me rezultatin 3-1, mbrëmjen e sotme në stadiumin “Fadil Vokrri” të Prishtinës, në sfidën e vlefshme për eliminatoret e Europianit të kësaj grupmoshe.
“Dardanët” e të ardhmes zhbllokuan sfidën vetëm në minutat shtesë të pjesës së parë, me anë të Arbenit Xhemajlit, i cili aktivizohet me zviceranët e Xamax, por turqit reaguan që në fillim të pjesës së dytë, duke barazuar me Dervisoglu.
Megjithatë të besuarit e trajnerit Rafet Prekazi nuk u dorëzuan dhe rigjetën avantazhin në minutën e 72-të, pas golit të shënuar nga Mirlind Daku, ndërsa 5 minuta nga fundi, Lirim Kastrati vulosi suksesin.
Me këtë triumf, Kosova mori vendin e parë në grup, me 6 pikë në dy ndeshje, duke lënë pas Turqinë me 4 pikë në 3 ndeshje dhe Shqipërinë me 2 pikë në 3 ndeshje.