Humbja e Milanit në transfertën ndaj Sampdorias ka ndezur alarmin se kuqezinjtë nuk janë akoma gati për të arritur objektivin, që është pjesëmarrja në Champions. Pikërisht për këtë arsye, drejtuesit e Milanit duket se i kanë vënë ultimatum trajnerit Montella, që të ndryshojë fytyrën e ekipit, duke filluar që nga ndeshja e të dielës ndaj Romës.
Ndonse para mediave u mundua të shfajësojë trajnerin për këto paraqitje, Marco Fassone duket i bindur se përgjegjësia bie e gjitha mbi Montella-n, i cili ende nuk ka arritur të stabilizojë dhe t’i japë formë ekipit. Në gjashtë javët e para, trajneri i Milanit ka eksperimentuar vazhdimisht, si me futbollistët e përzgjedhur në formacion, ashtu edhe me vendosjen në fushë. Në Xhenova, më shumë se humbja, drejtuesit e Milani i shqetësoi fakti që ekipi nuk ia del të përballet si duhet dhe të marrë rezultat me ekipe të nivelit mbi mesatar.
Roma do të jetë një test i rëndësishëm për trajnerin Montella, jo vetëm për tri pikët, por mbi të gjitha për mënyrën e interpretimit të ndeshjes dhe nëse nuk ia del, drejtuesit e Milanit mund t’ia besojnë dikujt tjetër drejtimin e ekipit, për të shfrytëzuar edhe ndërprerjen e kampionatit për shkak të ndeshjeve të kombëtareve.
Në orët e fundit, në mediat italiane ka filluar të qarkullojë emri i Walter Mazzarrit si kandidati më i mundshëm për të zëvendësuar Montellën, në rast shkarkimi. Ish trajneri i Napolit dhe Interit, është i papunë dhe do të mirëpriste një ofertë nga drejtuesit e klubit të Milanit. Mazzarri është një njohje e vjetër e Fassones, pasi të dy kanë bashkëpunuar për dy sezone te Napoli dhe një të Interi.
