Aksident spektakolar që në kthesat e para të pistës së Silverstonit gjatë garës së Çmimit të Madh të Britanisë në MotoGP. Ducati i Andrea Doviziosos u përplas me Yamahan e Fabio Quartararos, me pilotin italian që u rrëzua frikshëm në asfalt. Motori mori flakë, ndërsa Dovizioso u transportua me urgjencë në spital.
“Është mirë. Qe një çast kur humbi kujtesën, por të gjitha analizat që kemi bërë nuk kanë nxjerrë asnjë problem,” – deklaroi drejtori i stafit mjekësor të MotoGP, Angel Charte. – “Tani mund të orientohet dhe e kujton atë që ndodhi. E kemi dërguar në Coventry për ekzaminime të mëtejshme. Do të qëndrojë në spital gjatë natës e nëse gjithçka do të jetë “ok”, do të niset nesër drejt Italisë.”