Premier League

Mourinho, rinovim “faraonik” për 5 sezone

Manchester United kërkon të blindojë portugezin Jose Mourinhon me megakontratën prej 75 milionë eurosh deri në vitin 2022. Tekniku i “Djajve të Kuq”, nuk duket të ketë kundërshtime dhe pritet të firmosë kontratën më jetëgjatë të karrierës së tij. Manchester United ka “fluturuar” këtë sezon në drejtimin e Mourinhos, me klubin anglez që ndan vendin e parë të klasifikimit të Premier League-s me Manchester City-n. 54-vjeçari portugez është trajneri më i mirëpaguar në botën e futbollit, përkrah kolegut dhe rivalit të Manchester City-t, Pep Guardiola, me të dy teknikët që, respektivisht, fitojnë plot 250 mijë paund në javë. Kjo pagesë pritet të mbetet e njëjtë për Mourinhon, por shpërblimi i tij në rast trofesh dhe fitoresh do të ngjitet në stratosferë.

Detajet e fundit të kontratës janë ende duke u përpiluar. Në verën e Vitit 2016 Mourinho firmosi kontratën 3-vjeçare me United, por si drejtuesit e klubit anglez ashtu edhe vetë tekniku janë të bindur se kanë një partneritet ideal, ndaj palët janë shumë të kënaqura për zgjatjen e afatit kohor të bashkëpunimit. Progresi i Mourinhos me këtë ekip në vetëm 1 vit e gjysmë ka impresionuar drejtuesit anglezë si dhe ka bërë që të fitojë zemrat e tifozëve, të cilët do ta kenë teknikun edhe për 5 vitet e ardhshme.

To Top