Sipas trajnerit të Southampton, Ralph Hasenhuttl, të gjithë sulmuesit kalojnë periudha që nuk mund të shënojnë dhe shton se edhe atij vetë i ka ndodhur një gjë e tillë, ndaj e kupton talentin shqiptar, Armando Brojën.
Duke folur në prag të sfidës ndaj Brentford, që luhet këtë të shtunë në orën 16:00, tekniku theksoi se si Broja ashtu edhe Che Adams, nuk po ia dalin që të jenë në formën më të mirë të mundshme dhe po vuajnë mungesën e golave.
“Ndoshta nuk është e nevojshme t’u thuash atyre ku duhet të qëndrojnë në fushë, sepse ata e dinë këtë. Unë kam qenë gjithashtu sulmuesi dhe mund të jeni të sigurt që kam kaluar periudha pa shënuar gola në karrierë, dhe e di sesi ndihen.”-tha ai.
Më tej Hasenhuttl shtoi se sulmuesit e skuadrës së tij duhet të punojnë shumë dhe mbi të gjitha të marrin vendimet e duhura përpara portës.
“Unë mendoj se gjëja kryesore është që t’i sjellë ata më shpesh në pozicionin ku mund të shënojnë edhe pse u takon atyre të marrin vendime më të shpejta dhe vendimet e duhura para portës. Të gjithë e dimë që sulmuesit tanë duhet të punojnë shumë. Është e vështirë të shënosh, sidomos ndaj skuadrave shumë të forta.”-deklaroi trajneri i Southampton.
