Finalja e këtij edicioni të Digitalb Kupës së Kosovës do të jetë Feronikeli-Trepça ’89. Sikurse pritej, skuadra nga Drenasi dhe mitrovicasit, avancuan për në sfidën e fundit të kompeticionit, duke eliminuar Ballkanin dhe Vëllaznimin.
Feronikeli triumfoi edhe në gjysmëfinalen e kthimit ndaj Ballkanit më rezultatin 2-0, duke u kualifikuar me rezultat të përgjithshëm 4-1.
Goli i parë u shënua në minutën e 17-të nga Lapidar Lladrovci. Me këtë rezultat u mbyll pjesa e parë, por për të vulosur kualifikimin e Feronikelit mendoi Artur Magani, që shënoi golin e sigurisë në minutën e 82-të.
Takimi tjetër gjysmëfinal Trepça ’89-Vëllaznimi përfundoi me fitoren minimale të gjakovarëve (realizoi Kushtrim Gashi, pasi përfitoi nga një gabim i mbrojtjes vendas në minutën e 25-të). Një humbje që nuk mund të ndryshonte asgjë, pasi takimin e parë mitrovicasit e kishin fituar thellë 4-0.
