Pas 8 sezonesh me fanellën e Kukësit, Besar Musolli u rikthye në Kosovë dhe vendosi të nënshkruajë me skuadrën nënkampione të Gjilanit. Prezantimi zyrtar u bë pasditen e sotme, ndërsa mesfushori është vënë menjëherë në dispozicion të trajnerit Gentian Mezani.
I lindur në Podujevë 31 vite më parë, Musolli e nisi karrierën te Hysi dhe në verën e 2012-ës u transferua te Kukësi, ku ka qëndruar për plot 8 sezone dhe ka luajtur mbi 200 takime me fanellën e verilindorëve.
Te Kukësi Musoli ka fituar të gjithë trofetë e mundshëm në Shqipëri, si Kupën e Shqipërisë, titullin kampion dhe Superkupën, ndërsa në verën e 2017-ës mori ftesë edhe nga Përfaqësuesja e Kosovës.
Tani Musolli është gati për një tjetër aventurë, sërish në kampionatin e Kosovës, por këtë herë me fanellën e Gjilanit, që këtë sezon do të provojë të fitojë titullin kampion, pasi nuk ia doli në sezonin e kaluar.