Fitore cinike 1-2 e Napolit në transfertë me Genoan, rezultat që fut në krizë të thellë ekipin gjenovez, që në 6 takimet e fundit në Serinë A ka marrë 4 humbje dhe dy barazime.
Edhe pse pësoi e para gol në minutën e 20-të (realizoi Kouame), skuadra napolitane gjeti forca për të reaguar, duke përmbysur rezultatin në 1-2 në pjesën e dytë.
Reshjet e dendura të shiut e detyruan gjyqtarin kryesor Abisso që në minutën e 60-të ta ndërpriste ndeshjen, pasi terreni ishte rënduar se tepërmi, me skuadrat që u rikthyen në fushë pas rreth 10 minutash.
Kjo pauzë duket se i solli fat Napolit, që në minutën e 62-të barazoi me Fabian Ruiz, i cili u la i lirë të godiste portën në një pozicion ballor. Të besuarit e Carlo Ancelottit u treguan cinikë në minutat e mbetura dhe në 86-ën shfrytëzuan terrenin e rrëshqitshëm duke e detyruar Biraschin ta devijonte topin në portën e tij. Ky ishte goli i fundit i këtij takimi, i fituar ndoshta edhe me pak fat nga Napoli, që ngjitet në vendin e dytë me tri pikë më shumë se Interi, që luan këtë të diel kundër Atalantës në Bergamo.