Pauza e gjatë prej koronavirusit i bëri mirë Milwaukee Bucks që u rikthye te fitorja pas tre humbjesh radhazi dhe e bëri me një sukses bindës ndaj Boston Celtics me rezultatin 119-112 në HP Field House në Orlando, sfidë në të cilën shkëlqeu i përhershmi Giannis Antetokounmpo me 36 pikë, 15 rebound dhe 7 asiste. Kjo ishte fitorja e 54 sezonale për Bucks ndërkohë që Celtics pësuan humbjen e 22-të. Një fitore me peshë mori San Antonio Spurs që mposhti me rezultatin 129-120 Sacramento Kings. Skuadrës kaliforniane nuk i mjaftoi as paraqitja e shkëlqyer e Fox që realizoi 39 pikë. Një fitore të madhe pas kohës shtesë arriti Houston Rockets në derbin teksan ndaj Dallas Mavericks me rezultatin 153-149. James Harden ishte thjeshtë fantastik në këtë sfidë me 49 pikë, 9 rebound dhe 8 asiste.
