Boston Celtics kthehet një skuadër e zakonshme pa Kyrie Irving. Kryesuesit e Konferencës së Lindjes pësuan humbjen e dytë në tri ndeshjet e fundit, këtë radhë në parketin e Chicago Bulls, 108 – 85. Edhe pse kishte përballë një ndër skuadrat më të dobëta të Lindjes, Bostoni u dorëzua me 23 pikë diferencë. Mirotic dhe Portis, respektivisht me 24 dhe 23 pikë ishin më të mirët për vendasit, ndërsa në radhët e Celtics Horford shënoi vetëm 15 pikë. Kjo ishte humbja e shtatë sezonale për Bostonit, ndërsa Chigaco mori suksesin e shtatë.
Vijon marshimin e pandalshëm Golden State Warriors, që mundi 111-104 Portland Trail Blazers në “Oracle Arena”, ku, në fakt, spikati Lillard me 39 pikë, por falë dyshes Durant-Thompson, me 53 pikë në total, kampionët e NBA-së fituan me 7 pikë diferencë. Për Warriors vazhdon të mungojë Stephen Curry, për shkak të një problemi fizik.
Në fakt, në Perëndim vijon të dominojë Houston Rockets, që iu imponua 130-123 New Orleans Pelicans. Spektakël në “Toyota Center”, ku Holiday dhe Moore realizuan respktivisht 37 dhe 36 pikë, pra më shumë se gjysmën e totalit të Pelicans, por Rockets u shfaqën më skuadër, me zvicëranin Capela që rezultoi pikëshunëesi më i mirë për vendasit me 28 pikë, ndërsa Gordon dhe Harden shtuan në total edhe 53 pikë të tjera.
Zhgënjen sërish Oklahoma City Thunder, që në fushën e saj u mund 116-103 nga Charlotte Hornets. Westbrook bëri diferencën në fushë, duke realizuar 30 pikë për vendasit. Gjithsesi të pamjaftueshme për të shmangur humbjen. Për Charlotte 6 lojtarë realizuan me mbi 10 pikë, me Howard që ishte shënuesi më i mirë, me 23 pikë. Fitojnë Clippers, që mundën 96-91 Toronton me Williams e Harrell që realizuan 34 pikë së bashku, ndërsa Miami fitoi 82 – 107 në parketin e Memphis.