Cleveland Cavaliers gjen fitoren në NBA, pasi kaloi me sukses Milwaukee Bucks 116-97. Pavarësisht mbrëmjes shpërthyese të grekut Antetokounmpo me 34 pikë, 8 asiste e ribaunde, ishte skuadra nga Ohio që falë “mbretit” James dominoi në parket. Me 24 pikë personale, LeBron dhuroi paraqitjen më të mirë të këtij fillimsezoni, për të mos i lënë asnjë shteg shpëtimi skuadrës kundërshtare, që gjithsesi në këtë sezon mund të mbështetet fort te i riu grek që konsiderohet një nga talentet më të mëdhenj të koshit amerikan. Sukses të rëndësishëm arriti edhe Golden State, që mundi 128-120 New Orleans Pelicans falë dyshes Thompson-Curry. Për skuadrën nga Louisiana nuk mjaftuan Anthony Davis e DeMarcus Cousins, edhe pse arritën ta mbyllnin pjesën e parë në avantazh. “Splash Brithers” regjistruan në total 59 pikë, ndërsa Durant shtoi 22 të tjera për të nxjerrë nga telashet kampionët në fuqi të NBA. Boston Celtic e mori veten pas dy humbjeve rresht, duke u imponuar 102-92 ndaj Philadelphia 76ers. Një sukses i ndërtuar hap pas hapi falë edhe rritjes progresive të blerjes së verës, Kyrie Irving. Nuk funksionoi në mbrëmjen e së premtes Atlanta Hawks, që u dorëzua përballë Charlotte Hornets 91-109, ndërsa Dallas regjistron humbjen e dytë sezonale pasi u mund nga Sacramento KIngs 93-88, pasi kalifornianët u udhëhoqën nga Hill me 21 pikë, 2 asiste dhe 5 ribaund, që ishin vendimtarë në minutat finale të ndeshjes. Në Perëndim nuk di të ndalet Portland, që shkatërroi 114-96 Indiana Pacers në një natë magjike për McCollum me 28 pikë, ndërsa “ylli” i skuadrës, Damian LIllard, u mjaftua me 18 pikë. Moment pozitiv po kalon në Lindje edhe Washington, që falë treshes Porter-Wall-Beal gjunjëziu Detroit Pistons 115-111.
