Los Angeles Lakers nuk arrin të ngrejë kokë. Fitorja ndaj Phoenix Suns ishte vetëm një “mirazh”, pasi skuadra kaliforniane ka pësuar humbjen e 4-t në 5 ndeshjet e fundit dhe tashmë kualifikimi në play-off vështirësohet gjithnjë e më shumë për Lakers. Mungesa e mbretit James po ndihet shumë me kalifornianët që u mposhtën lehtësisht brenda në Staples Center nga Philadelphia 79ers me rezultatin 105-121. 36 pikët e Brandon Ingram nuk mjaftuan për Lakers të cilët pësuan disfatën e 25-të në 51 ndeshje. Më i miri mbi parket për 76ers ishte i përhershmi Joel Embiid autori i 28 pikëve 6 asisteve dhe 11 rikuperimeve, ndërsa një paraqitje të mirë bëri edhe Jimmy Butler. Rezultoi më e vështirë sesa parashikohej sfida përballë Phoenix Suns për San Antonio Spurs. Teksanët triumfuan vetëm në fund me rezultatin e ngushtë 126-124 ndaj ekipit nga Arizona. LaMarcus Aldrige me 29 pikë 4 asiste dhe 14 rebound ishte ai që udhëhoqi Spurs drejt fitores ndërkohë që te Phoenix shkëlqeu sërish Booker me 38 pikë në total.
Zhgënjeu Houston Rockets. Skuadra teksane u mposht në shtëpi nga Neë Orleans Pelicans me rezultatin 116-121. Mungesat e dy yjeve të ekipit Anthony Davis dhe Nikola Mirotic nuk u ndjenë aspak te Pelicans të cilët iu falën lojës së shkëlqyer së dyshes Okafor-Holiday. Në krahun tjetër James Harden koleksionoi në total 37 pikë, 6 asiste dhe 11 rikuperime. Nuk ndalet Oklahoma City Thunder. Skuadra e trajnerit Billy Donovan mori fitoren e 6-të radhazi pasi kaloi në transfertën e Floridas, Orlando Magic me rezultatin 126-117. Vazhdon të shkëlqejë Paul George autori i 37 pikëve, megjithatë Rusell Westbrook nuk njeh limite. Ylli i City Thunder edhe në këtë sfidë arriti shifrat e dyfishta në çdo aspekt të lojës duke e mbyllur ndeshjen me 23 pikë 14 rebound dhe 14 asiste.