Në mbrëmjen që mbylli raundin e dytë të ndeshjeve të serisë play off në NBA, Milwaukee, Houstoni e Bostoni e shfrytëzuan më së miri faktorin fushë, duke korrur fitoret e dyta.
Spektakolare përmbysja e rezultatin nga Boston Celtics, që fituan 99-91 ndaj Indiana Pacers, edhe pse u gjendën -12 pikë në fillim të periodës së fundit. Protagonisti absolut i mbrëmjes ishte Kyrie Irving me 37 pikë në total, por vendimtar në skuadrën e drejtuar nga Brad Stevens rezultoi Jayson Tatum me 26 pikë, ndërsa për miqtë nuk mjaftuan 23 pikët e Bojan Bogdanovicit për të barazuar serinë.
Zhvilluan një ndeshje pozitive Detroit Pistons në parketin e Milwaukee Bucks, por e kishin të pamundur të shmangnin humbjen përballë skuadrës më të mirë të sezonit të rregullt. Të udhëhequr nga Eric Bledsoe (27 pikë), Giannis Antetokounmpo (26 pikë e 12 “rebound”) e Khris Middleton (24 pikë), Bucks fituan me rezultatin 120-99. Pas një pjesë të parë të ekuilibruar, diferenca u bë në periodën e tretë me një rezultat të pjesshëm 35-17 falë klasit të Antetokounmpos e Middleton, ndërsa në periodën e fundit vendasit thjesht manaxhuan epërsinë.
Asnjë problem për Houston Rockets, që fituan edhe të dytën përballë Utah Jazz me 20 pikë diferencë, 118-98, ku peshën më të madhe të këtij suksesi e mbajti James Harden me “triple-double”: 32 pikë, 10 asiste dhe 13 “rebound”, ndërsa Chris Paul dhe Eric Gordon realizuan respektivisht 17 dhe 16 pikë. Formacioni i Mike D’Antoni u shkëput që në periodën e parë, të cilën e fitoi thellë 39-19, duke mos u lënë më asnjë hapësirë kundërshtarëve që të shpresonin në ndonjë mrekulli. Ndeshjet e radhës zhvendosen ne fushën e Jazz.
Rezulatet:
Houston Rockets – Utah Jazz 118-98
Milwaukee Bucks – Detroit Pistons 120-99
Boston Celtics – Indiana Pacers 99-91
