Charlotte Hornets – New York Knicks ishte sfida më spektakolare e mbrëmjes në NBA, e cila e përcaktoi fituesin vetëm në shtesë, ndërsa koha e rregullt u mbyll 117 – 117. Hornets triumfuan në fund 137-128, me protagonist absolut Kemba Walker, që shënoi 31 pikë në total, 11 vetëm në kohën shtesë. Në radhët e skuadrës që ka si pronar legjendën Michael Jordan vlen të veçohet edhe Dwight Howard, autor i 23 pikëve dhe 13 rikuperimeve. Walker me shokë iu desh t’i bënin mirë llogaritë me Trey Burke të Knicks, që shënoi plot 42 pikë dhe dha 12 asiste, por që nuk u mjaftuan njujorkezëve për të shmangur humbjen. Në sifdën e radhës kundër Cleveland, për Kemba Walker do të mjaftojnë 20 pikë për t’u shndërruar pikëshënuesi më i mirë në historinë e Charlotte.
Detroit Pistons fitoi 112 – 106 ndaj Los Angeles Lakers në “Little Caesars Arena”, me Reggie Jackson që u rikthye me ritëm të plotë nga dëmtimi, duke realizuar 20 pikë. Ishin plot 6 basketbollistë të Pistons kishin shifra të dyfishta, ndërsa më i miri mbi parket, edhe pse doli i mundur nga kjo përballje, ishte Randle i Lakers, me 23 pikë dhe 11 rikuperime.
Philadelphia 76ers i dha një goditje të rëndë shpresës së Denver Nuggets për zonën play off, duke fituar 123-104. Nga 20 pikë secili realizuan Embiid dhe Saric, ndërsa për Denverin spikati me 25 pikë Barton.
Minnesota Timberwolves pësoi një humbje të papritur 93-101 nga Memphis Grizzlies, megjithatë mbetet në zonën play off, duke përfituar edhe nga disfata e Nuggets. Nuk u mjaftuan vendasve 25 pikët e Teague, ndërsa Marc Gasol shënoi 20 pikë dhe rikuperoi 10 topa për Grizzlies.
Boston Celtics, skuadra e dytë në Konferencën e Lindjes, fitoi pa shumë vështirësi në parketin e Phoenix Suns 94 – 102.
