Fitore e vështirë për Golden State Warriors në shtëpi, me rezultatin 120-116 kundër Dallas Mavericks. Një ndeshje mjaft e ekuilibruar, ku pavarësisht mungesës së Dennis Smith Jr., Dallas u përpoq deri në fund për të marrë një rezultat pozitiv. Më i miri për kampionët në fuqi ishte Kevin Durant, me 29 pikë, 12 topa në tabelë dhe 8 asiste, ndërkohë që tek Mavericks shkëlqeu i zakonshmi Luka Doncic, me 19 pikë dhe 5 assist.
Fitore e thellë për Philadelphia 76ers, të cilët mundën rivalët e Toronto Raptors 101-126. Tek kanadezët, u ndje shumë mungesa e Kawhi Leonard, pikë kyçe për mbrojtjen dhe sulmin e skuadrës. Paraqitje fantastike nga Ben Simmons dhe Joel Embiid, të cilët së bashku shënuan së bashku 53 pikë. Për Toronton, ishte Pascal Siakam ai që u mundua të bënte diçka më shumë në këtë sfidë, duke realizuar 26 pikë dhe duke marrë 6 rebound.
Sukses i Houston Rockets, me rezultatin 101-108 përballë San Antonio Spurs. Në derbin teksan, MVP i sezonit të shkuar, James Harden, udhëhoqi Rockets me 39 pikë dhe 10 asist, duke bërë të mos ndihet mungesa e yllit tjetër, Chris Paul. Nga ana tjetër, për ekipin e Gregg Popovich nuk ishin të mjaftueshme 28 pikët, 7 topat në tabelë dhe 8 asistet e DeMar DeRozan.
Një ndeshje e çmendur ishte ajo në Washington, aty ku Wizards mposhtën 146-149 Phoenix Suns, pas tre periodave shtesë. Bradley Beal arriti të bëjë një triple-double për Wizards, me 40 pikë, 11 rebound dhe 15 asist për shokët e skuadrës. Ndërkohë, më të mirët për Phoenix ishin Devin Booker me 33 pikë e 14 asist, si dhe DeAndre Ayton me 26 pikë dhe 17 topa në tabelë.