Kategoria Superiore

Ndaj Kastriotit, debutimi i vërtetë i Klodian Duros

22 maj 2016, finalja e Kupës, Kukësi-Laçi. Verilindorët triumfojnë me penallti për të fituar trofeun e parë në historinë e klubit. Në krye të skuadrës ishte Klodian Duro, që drejtoi ekipin për një periudhë të shkurtër nga nëntori i 2015 deri në finalen e fituar.

Nga ajo periudhë ish-fantazisti i Kombëtares ka qëndruar larg futbollit, derisa vendosi te merrte drejtimim e Kamzës, ku objektivi parësor është mbijetesa, edhe pse nën zë drejtuesit pretendojnë të sulmojnë Europën. 41- vjeçari do të debutojë të shtunën ndaj Kastriotit, edhe pse, në fakt, ndeshjen e parë në krye të skuadrës e zhvilloi në Kupën e Shqipërisë ndaj Besës.

Prova e vërtetë është kampionati, duke qenë se Kupa ishte në raundin e parë dhe diferencat midis skuadrave janë të mëdha. Kanë kaluar mbi 10 ditë në drejtimin e Kamzës dhe tashmë Duro ka njohur nga afër lojtarët, por ajo që duhet risjellë në memorie është egërsia e kampionatit.

Për më tepër që përballë është një kundërshtar që vjen nga Kategoria e Parë dhe ka dëshirën e madhe për të bërë mirë. Gjithçka duket në favor të Duros, pasi ka në dispozicion një skuadër të ndërtuar me kujdes, të stërvitur mirë nga paraardhësi i tij, Bledar Devolli, dhe mbi të gjitha vetë timonieri i ri ka dëshirën për të treguar se është rastësi qëndrimi larg stolave të Superiores për një periudhë kaq të gjatë.

To Top