Sezoni që sapo u mbyll ishte i jashtëzakonshëm për Regi Lushkjen. Fantazisti nga Kavaja shkëlqeu me Laçin në Conference League dhe kampionat, teksa në janar erdhi aventura e parë jashtë futbollit shqiptar.
26-vjeçari firmosi me Sheriff Tiraspol, ekip me të cilin fitoi titullin kampion dhe Kupën e Moldavisë. Lushkja vendosi finalen kundër Sf Gheorghe falë një eurogoli në minutën e pestë shtesë.
Me Laçin regjistroi dy gola dhe një asist në Conference League, gjashtë gola dhe tre asiste në kampionat, teksa realizoi edhe tre gola me Sheriffin: dy në kampionat dhe më të bukurin në finalen e Kupës.
Mesfushori ofensiv është nderuar e vlerësuar në qytetin e Lindjes. Bashkia Kavajë i ka akorduar futbollistit një certifikatë mirënjohje, me motivacion: futbollisti kavajas një talent që ka shkëlqyer në arenën kombëtare dhe ndërkombëtare duke treguar vlera të larta sportive si profesionist.
Nder për qytetin dhe kombin – lexohet ndër të tjera në vlerësimin për Regi Lushkjen, i cili do të luajë në raundet eliminatore të Champions League me ekipin moldav, teksa ëndërron të marrë edhe një ftesë nga kombëtarja kuqezi.
“Dua të falënderoj Bashkinë e Kavajës dhe Kryetarin e Bashkisë për këtë vlerësim që më bën! Kënaqësi të takoja Kryetarin e Bashkisë dhe krenar që qyteti im i lindjes krenohet me arritjet e mia! Faleminderit!“, shkruan Regi Lushkja.