Që prej rikthimit të Zinedine Zidane, Eder Militao ishte futbollisti i parë që nënshkroi me Realin e Madridit, por prezantimi zyrtar u bë vetëm sot, pasi futbollisti përfundoi angazhimin me Brazilin në Kupën e Amerikës.
Qendërmbrojtësi pozoi në krah të presidentit madrilen Florentino Pereaz dhe më pas u ul në sallën e konferencave të klubit, për t’iu përgjigjur pyetjeve të gazetarëve të pranishëm, por këtu jo gjithçka shkoi mirë.
Kjo pasi në një moment Militao nuk po ndjehej mirë dhe humbi përqendrimin, duke kërkuar me mirësjellje, që konferenca për shtyp të ndërpritej dhe më pas u largua në ambientet e brendshme të klubit.
Për 21-vjeçarin Reali i Madridit pagoi 50 milionë euro në arkat e Portos, ndërsa Militao tani do të nisë pushimet verore, për t’u rikthyer në fund të muajit në Madrid dhe për të nisur punën nën urdhrat e Zinedine Zidane.