Pasi e mbylli vitin 2017 me 3 humbje radhazi, Kamza u rikthye te fitorja, teksa mposhti bindshëm Laçin, duke prishur edhe serinë prej 4 suksesesh radhazi të kurbinasve. Skuadra e Ndreut ishte vendosur mjaft mirë në fushë dhe interpretoi në mënyrën e duhur ndeshjen, duke gjetur kohën për të goditur kundërshtarin.
“Ishte një ndeshje e vështirë, duke parë edhe kundërshtarin që kishim përballë, por rëndësi ka që morëm 3 pikët dhe e nisëm vitin me këmbën e duhur. Në fund të 2017-ës na kapi pak edhe euforia dhe pësuam ato 3 humbje, që na shërbyen sepse na rikthyen me këmbë në tokë”, u shpreh Ndreu.
Trajneri i Kamzës komentoi edhe lëvizjet në merkato, ku skuadrës iu largua një nga pikat më të forta, qendërmbrojtësi kroat, Fustar, teksa tha se skuadra ka marrë një zëvendësues për të, i cili pritet të luajë në javët në vijim.
“Kemi marrë një mbrojtës malazez për të zëvendësuar Fustarin, por sot nuk mund ta aktivizonim pasi nuk dinim gjendjen e tij fizike. Besoj se do të na shërbejë shumë për pjesën e mbetur të sezonit.
