Trajneri i Kamzës, Ramazan Ndreu u shpreh i zhgënjyer për humbjen në Vlorë, teksa akuzoi se presioni i ushtruar ndaj arbitrave, solli gabime deçizive nga ana e tyre.
‘Nuk mund ta imagjinoj se si mund të luhet një takim, kur ndaj arbitrave ushtrohet aq shumë presion para ndeshjes. Kam dyshimet e mia për golin e anuluar, sepse nuk pashë faull më parë, por edhe për një penallti të mohuar ndaj nesh”, tha Ndreu.
Trajneri i Kamzës komentoi edhe ecurinë e skuadrës në këto 7 javë të para, ndërsa shpalosi edhe objektivat e ekipit, për këtë sezon të parë në Superligë.
“Jemi skuadër e ndërtuar rishtazi dhe objektivi ynë është të qendrojmë në mesin e tabelës. Me aq sa kam parë në këto 7 javë, them se jemi në gjendje të arrijmë këtë objektiv. Gjithsesi, uroj që ndeshje si kjo, me presion ndaj gjyqtarëve dhe me gabime të tilla, të mos përsëriten më, as për ne dhe as për skuadrat e tjera”, tha trajneri Ndreu.