Lazio zhvilloi një ndeshje perfekte në stadiumin Olimpico teksa mposhti Milanin me rezultatin e thellë 4-0. Pjesë e skuadrës bardhekaltër ishte edhe Elseid Hysaj me lojtarin e kombëtares shqiptare që u aktivizua për 90 minuta të plota nga ana e trajnerit Maurizio Sarri.
Shkodrani ishte autor i një paraqitje pozitive duke ia dalë më së miri në neutralizimin e sulmit kuqezi teksa edhe Eurosport vlerësoi me një notë të lartë paraqitjen e mbrojtësit. 6.5 ishte nota e Eurosport për Hysajn ku theksohet edhe fakti që 28-vjeçari ndihmoi duke bërë detyrën e tij jo vetëm në difensivë, por edhe në aspektin ofensiv.
Hysaj, 6.5- “Luan në të majtë me Marusic në të djathtë. Messias nuk i shkakton asnjë problem dhe është autor i një ndërhyrje shpëtimtare ndaj Leaos. Në këtë ndeshje ndihmon edhe në sulm”, shkruan Eurosport për paraqitjen e shkodranit.
Në këtë sezon të Serisë A, Hysaj koleksionon 15 paraqitje me fanellën e Lazios në kampionat ndërsa regjistron edhe një asist.