Shkëndija e Tetovës ende nuk ka vendosur se çfarë do të bëjë me trajnerin Ernest Gjoka nëse do t’i rinovojë apo jo kontratën, por mediat në Maqedoninë e Veriut e bëjnë fakt të kryer largimin e tij dhe madje zbulojnë edhe se cili do të jetë tekniku i ri i kuqezinjëve tetovarë, i cili do të vijë në skuadër me një përforcim shumë të rëndësishëm. I përzgjedhuri i drejtuesve të klubit tetovar për stolin është trajneri aktual i Skënderbeut Ilir Daja, i cili në Maqedoni do të marrë me vete edhe një nga lojtarët më të mirë të kampionatit shqiptar, është e sigurt për këtë një nga mediat maqedonase.
Bëhet fjalë për futbollistin më në formë për momentin te Partizani, Eraldo Çinari. Sipas “sportmedia.mk”, 23-vjeçari do të jetë një nga përforcimet e mëdha të Shkëndijës në merkaton e verës. Shkodrani është një dëshirë e trajnerin Ilir Daja. I njëjti burim bën me dije se palët kanë arritur marrëveshjen paraprake në parim, teksa mungon vetëm zyrtarizimi, i cili pritet të vijë në ditën në vijim. Klubi shqiptar që militon në Maqedoninë e Veriut, pritet të paguajë një shumë të konsiderueshme për të marrë kartonin e Çinarit, i cili aktualisht ka edhe një vit kontratë me Partizanin.