Në pritje të Edin Dzekos, i cili pritet të vihet nën urdhrat e Andrea Pirlos në fillim të javës së ardhshme, klubi i Juventusit po mendon për të afruar edhe një tjetër qendërsulmues, që është futbollisti i rritur në akademinë e klubit bardhezi, Moise Kean.
Ky i fundit u shit një vit më parë te anglezët e Everton, ku nuk ka arritur të shndërrohet në titullar dhe ka dhënë miratimin për t’u rikthyer në kampionatin italian, ku do të bënte zëvendësuesin e parë të Dzekos.
Nga ana tjetër Juventus preferon Kean edhe për faktin se e ka më të lehtë ta përfshijë në listën e federimeve në Champions, por momentalisht bisedat me drejtuesit e Evertonit kanë ngecur.
Kjo pasi anglezët duan ta shesin njëherë e mirë sulmuesin italian, ose ta huazojnë me detyrim blerjeje, ndërsa në Torino duan vetëm një huazim të thjeshtë të Kean, duke ruajtur vetëm të drejtën e blerjes për verën e ardhshme.
Sulmuesi 20-vjeçar ka luajtur 17 takime me Juventusin në sezonin 2018-2019 dhe ka arritur të shënojë edhe 7 gola, ndërsa grumbullohet rregullisht edhe nga Roberto Mancini te Italia, ku ka arritur të luajë 5 ndeshje deri tani.