Ndërkohë që Icardi e Nainggolan nuk kanë dhënë ende më të mirën e tyre në kampionat, arsyeja që i jep buzëqeshjen Luciano Spalletit është mbrojtja solide e skuadrës së tij, pas vështirësive kundër Sassuolos e Torinos në dy javët e para.
Një sektor i cili duhej të pësonte një rinovim total, pasi nga sezoni i shkuar vetëm Skriniar ishte në lartësinë e duhur. Por, në ndeshjen me Sampdorian, për shkak të dëmtimit të Vrsajlkos dhe lënies pushim të De Vrij, i vetmi lojtar i ardhur në merkaton e verës në mbrojtje, i cili po luante në ndeshjen e së shtunës, ishte Asamoah.
E nuk është gjë e vogël që Interi nuk ka pësuar gol në atë takim, pasi Sampdoria vinte si ekipi me sulmin më të mirë në Serinë A, me 9 gola. Nga minuta e 16 deri në të 76, klubi nga Genoa nuk ka arritur të godasë asnjëherë portën, e për këtë merita është më së shumti e prapavijës, përveç mekanizmave mbrojtës, të cilët përfshijnë gjithë skuadrën.
D’Ambrosio nuk i la asnjë hapësirë Defrelit, ndërsa Asamoah e Skriniar ishin dominues ndaj kundërshtarëve. E nëse Miranda e teproi në disa raste me topat e gjatë, ai ofroi siguri në pozicionim dhe lojën në ajër.
Për sa i përket sulmit, ka akoma punë për të bërë, por aktualisht për zikaltrit është e rëndësishme që i janë kthyer fitoreve. Icardi e Nainggolan duhet të mësohen më shumë së bashku, por kjo detyrë do të jetë më së shumti edhe e Spallettit.
Ndeshja e ardhshme për Interin do të jetë të martën, kundër Fiorentinës në San Siro. Nuk do të jetë e lehtë përballë skuadre mjaft të rrezikshme, e cila aktualisht mban vendin e tretë në kampionat, e që drejtohet nga një ish-trajner i klubit milanez, si Stefano Pioli.
