Gael Monfils siguroi titullin e tetë në karrierë në turnetë ATP, teksa mundi në finalen e turneut të Roterdamit tenistin zviceran Stan Wawrinka. 32-vjeçari francez zhvilloi një ndeshje shumë të mirë, duke i rezistuar goditjeve të forta të tenistit helvet, madje Monfils ia doli mbanë të kthehej në lojë, pavarësisht se u shpërfytyrua 6-1 në setin e dytë, në pothuajse gjysmë ore lojë.
Në arenën gjigante “Ahoy”, përpara 15.000 spektatorëve, numri 68 i botës e filloi mirë takimin, megjithatë tenisti parizien u mbrojt me fanatizëm dhe përfitoi në maksimum nga gabimet e shumta të 33-vjeçarit nga Lozana, për ta thyer dy herë në servis kampionin e vitit 2015.
Stan reagoi shkëlqyeshëm në setin pasardhës dhe u kundërpërgjigj në mënyrën më të mirë të mundshme, teksa i rrëmbeu tri herë shërbimet numrit 33 të klasifikimit të përgjithshëm ATP. Wawrinka, që kryesonte 3-2 bilancin e përballjeve ndërmjet tyre, i kishte fituar dy sfidat e fundit me Gael Monfils pa humbur asnjë set, për më tepër në turne të tillë Slam si Australian Open dhe Roland Garros, gjithsesi tenisti helvet filloi përsëri festivalin e gabimeve dhe 32-vjeçari parizien e mori veten duke e ndëshkuar dy herë të tjera në servis veteranin zviceran.
Përfundimisht Monfils mbylli gjithë takimin me rezultatin 6-3, 1-6, 6-2 në 1h 42′ lojë, duke koleksionuar njëherësh edhe trofeun e parë, që pas titullit të fituar në janarin e vitit të kaluar në Doha në Katar. Tenisti francez e fitoi duelin me vetëm tri pikë më tepër sesa miku i tij, sepse për hir të së vërtetës dy tenistët njihen shumë mirë me njëri-tjetrin, pasi stërviten bashkë prej plot 14 vjetësh.
Me 500 pikët e fituara Monfils u përmirësua ndjeshëm në renditje, duke iu afrua shumë 20-shes së parë të botës, ndërsa Wawrinka në krahun tjetër me 300 pikët e finales u rikthye në 40 më të mirët e botës.
Tenisti francez që ka humbur 21 nga 29 finalet e zhvilluara në karrierë mori gjithashtu edhe çekun e majmë prej 405.000 eurosh, ndërsa sportisti helvet në krahun tjetër luajti finalen e parë që nga viti 2017, më saktë që nga takimi me spanjollin Rafael Nadal në Roland Garros.
