Universitatea Craiova do të zbarkojë sërish në Shqipëri. Ekipi rumun u eliminua nga Laçi verën e kaluar në raundin e dytë të Conference League, teksa shorti e vuri përballë Vllazninë këtë radhë.
Dështimi përballë bardhezinjve kurbinas (0-1, 0-0) u përjetua keq në Rumani. Sorin Cartu mban postin e presidentit të Univ Craiova prej marsit të vitit 2019.
Në prononcimin për Prosport.ro, 66-vjeçari deklaroi se pret hakmarrje përballë Vllaznisë. “Jemi gati për këto dy ndeshje europiane. E mora vesh menjëherë se me kë na ra shorti në Conference League.
Tani po kërkoj informacione për këtë kundërshtar, por është e qartë që duhet të hakmerremi në Shqipëri! Nuk kemi asnjë justifikim këtë herë, duhet të jemi seriozë“, deklaroi në mesazhin e tij kreu i klubit rumun.
Vllaznia do të sfidojë Univ Craiova në turin e dytë të Conference League. Ndeshja e parë do të luhet në “Loro Boriçi” më 21 korrik dhe ajo e kthimit pas një jave në “Stadionul Ion Oblemenco” të Craiovës.