“Kylian Mbappe ka origjinë afrikane, por ai është stërvitur në Europë. Po të kishte lindur në Kamerun, ai nuk do të ishte bërë ky lojtar që është…
Ekziston Europa dhe pjesa tjetër e botës, dhe pjesa tjetër e botës ka nevojë për ndihmë, përndryshe do të humbasim shumë talente”.
Këto fjalë të Arsene Wenger në lidhje me yllin e PSG-së, prindërit e të cilit janë me origjinë nga Kameruni, kanë shkaktuar diskutime dhe polemika.
Ish-trajneri francezi i Arsenalit, aktualisht shefi i zhvillimit global të futbollit të FIFA-s, bëri këtë deklaratë disa ditë më parë në Freiburg, teksa ka ardhur edhe reagimi i CONMEBOL (Konfederata e Futbollit të Amerikës së Jugut).
“CONMEBOL hedh poshtë dhe dënon fjalët shumë fatkeqe të zyrtarit të lartë të FIFA-s, person shumë pranë presidencës. Ne amerikano latinët e njohim shumë mirë këtë lloj qëndrimi, që buron nga besimi se bota fillon dhe mbaron në Europë.
Talenti, shpirti i sakrificës dhe dëshira për të shkëlqyer e lojtarëve afrikanë dhe amerikano-jugor, duhet të vlerësohen dhe respektohen”, lexohet në komunikatën zyrtare të CONMEBOL.