Neymar ka lënë pas dëmtimin e përsëritur në këmbë dhe tashmë, me fundin e sezonit që po afron, “ylli” brazilian i rikthehet stërvitjes. Sulmuesi 27-vjeçar që i është bashkuar grupit të tij ditën e enjte. Lajmin e konfirmojnë kampionët në fuqi të Francës në Twitter.
Sulmuesi, i cili pas seancave të fizioterapisë së vazhdueshme ka bërë dhe një seancë stërvitore të veçuar gjatë javës që lamë pas, pritet që të jetë në gjendje optimale dhe shpresat e PSG-së janë që të kenë shërbimet e tij për sfidën e 27 prillit, përballë Rennes, në finalen e Kupës së Francës.
I dëmtuar në sfidën ndaj Strasbourgut 23 janarin e shkuar, fenomeni brazilian iu nënshtrua menjëherë një terapie intensive, që i lejoi të evitonte një ndërhyrje të re kirurgjikale të përsëritur. Lajmet e infermierisë janë optimiste dhe flasin për një rikuperim nga dëmtimi. Rikuperimi i Neymar është gjithashtu një lajm i mirë edhe për kombëtaren braziliane të futbollit. Tashmë “ylli” i “Seleçaos” do të ketë mundësinë të jetë në Kupën e Amerikës, që do të zhvillohet në Brazil nga 14 qershori deri më 7 korrik.
Mungesa e Neymarit ishte një faktor me peshë në ecurinë negative të PSG në edicionin e këtij viti në Champions, me parizienët që u eliminuan në fazën e 1/8-ave nga Manchester United.
