Irritim, trishtim dhe i frustruar. Kjo është gjëndja e Neymar që nuk arriti dot të transferohej tek Barcelona. Sipas burimeve nga afër sulmuesit, braziliani ende nuk e beson dot që numri një i klubit Naser Al-Khelaifi refuzoi në mënyrë të vazhdueshme çdo ofertë të katalanasve, e fundit ishte ajo që kapte shumën e 150 milionë eurove, bashkë me shumën do të jepej në formën e huazimit Dembele, ndërsa klubit francez do t’i ofroheshin edhe Rakitic sëbashku me Todibon.
Neymar bëri çmos që të rikthehej në Camp Nou dhe të shkëlqente me fanellën blaugrana, pasi kohët e fundit dëmtimet e shpeshta e kanë penguar atë. Braziliani e dëshironte aq shumë kalimin tek Barcelona, saqë ishte i gatshëm të paguante 20 milionë euro, por sërish drejtuesit e klubit ishin të vendosur për të mos e lejuar largimin.
Një situatë e rëndë për sulmuesin, i cili me drejtuesit e klubit tashmë i ka prishur marrëdhëniet. Divorci është i pashmangshëm, nëse nuk ndodhi këtë merkato është e sigurt që verën e ardhshme një gjë e tillë do të ndodhë.