Kapiteni i Kastriotit, Sokol Neziri komentoi fitoren e krutanëve ndaj Skënderbeut, teksa në intervistën për “Gol pas Goli” zbuloi ambiciet e tij për të ndërruar ambient sezonin e ardhshëm.
“Kjo fitore na jep vetëm tre ditë qetësi, pasi jemi sërish aty në zonën e fundit dhe kemi shumë punë për të bërë, që të sigurojmë mbijetesën. Stafi teknik që ka ardhur, na ka ndryshuar si në aspektin psikologjik, ashtu edhe atë të lojës, ndaj edhe kemi ndryshuar për mirë.
Cilësitë e Hasanit i dimë të gjithë dhe natyrisht që prania e tij na ka dhënë qetësi dhe na ka përmirësuar ndjeshëm. Është një lojtar me vlera të shumta, që po na ndihmon jo pak. Sa u përket ndeshjeve në transfertë, mendoj se është çështje mentaliteti, pasi shkojmë për të mos humbur dhe kjo na penalizon.
Sa i përket aspektit personal, do të doja shumë të provoja një eksperiencë tjetër sezonin e ardhshëm, por për momentin duhet të përqendrohem të arrij objektivin me Kastriotin”, u shpreh Neziri.
