Kush e “mori më sysh” Bylisin?! Kush i mallkoi ballshiotët?! NJë skuadër që po përjetonte një ëndërr e sheh veten disa metra larg një humnerë, diçka e paimagjinueshme vetëm një muaj më pare, kur mallakastriotët po mahnitnin me paraqitjet dhe me rezultatet e marra. Duket se tashmë i është gjendur çelësi, “pini” dhe “puku” Bylisit dhe përpos performancave pozitive në disa raste, humbjet dhe pikët e shumta të lëna në 2020-ën, më kryesorja fakti që ende nuk kanë ftuar asnjë takim në këtë vit kalendarik në kampionat, ndërkohë që në 17 ndeshjet e para të sezonit triumfuan në 8 raste, ka bërë që skuadra e Dovedan të përpihet pa e kuptuar në vorbullën e qëndrimit në Superiore.
Vllaznia, që mban vendin e 8-të, pozicion që të dërgon në “play out”, ka vetëm 3 pikë më pak se Bylisi. Në Laç, skuadra u ndëshkua nga disa gabime. Nëse vijon në të njëjtën linjë, nuk do të jetë e largët dita kur ballshiotët të përfundojnë në pozicionin e “play out”-it. Duket se fjalët titull dhe Europë bënë që Bylisi “të fluturonte” me imagjinatën, duke harruar kampionatin, duke harruar se sa i çuditshëm është futbolli, ku në pak kohë mund të përfundosh nga parajsa në ferr.
