Pas dy fitoreve në dy ndeshjet e para, Dinamo zhgënjeu në javën e 4-t të grupit A të Kategorisë së Parë pasi u ndal nga Veleçiku në një barazim pa gola. Të treja sfidat që u luajtën sot në grupin A përfunduan në barazim pasi edhe Besëlidhja dhe Burreli u ndanë në një barazim pa gola ndërsa Partizani B dhe Korabi ndanë pikët pas një barazimi 1-1 me gola të Lalës dhe Bërdufit për kryeqytetasit. Grupi A kryesohet nga Korabi dhe Burreli me nga 10 pikë të ndjekur nga Besëlidhja dhe Dinamo me nga 7 por si lezhjanët edhe kryeqytetasit kanë zhvilluar nga një ndeshje më pak.
Në grupin B të Kategorisë së Parë kryeson e vetme Egnatia e Gugash Maganit që është edhe pretendentja kryesore për t’u ngjitur në Kategorinë Superiore në këtë grup. Në Peqin, Egnatia mposhti lehtësisht 3-0 Flamurtarin që nuk po gjen paqe edhe në Kategorinë e Parë teksa pozicionohet në vendet e fundit. Golat për rrogozhinasit u realizuan nga Magani, Çelhaka dhe Shtubina. Mori fitoren e 3-të në 4 takime Besa e Kavajës që kaloi 2-0 Turbinën e Cërrikut me golat e Da Silvës dhe Peqinit. Festoi edhe Lushnja që triumfoi 0-1 në transfertën ndaj Elbasanit me një gol të Xekas. Egnatia kryeson pas 4 javësh grupin B me 10 pikë e ndjekur nga Besa me 9 dhe Lushnja me 8 pikë.